اسلام آباد (نئی تازہ رپورٹ)چیف الیکشن کمشنر سکندر سلطان راجا نے پنجاب اسمبلی کے عام انتخابات کے حوالے سے ای سی پی کا خصوصی اجلاس طلب کرلیا۔رپورٹس کے مطابق چیف الیکشن کمشنر سکندر سلطان راجا کی سربراہی میں ہونے والے اجلاس میں پنجاب کی صوبائی اسمبلی کے عام انتخابات کے حوالے سے تبادلہ خیال کیا جائے گا۔ لاہور ہائی کورٹ کی جانب سے صوبے میں 90 روز کے اندر انتخاب کرانے کے لئے تاریخ کا اعلان کرنے کے حکم کے ایک روز بعد ہی یہ اجلاس طلب کیا گیا ہے۔ اطلاعات کے مطابق الیکشن کمیشن کا اجلاس پیر کو ہوگا ۔
الیکشن کمیشن حکام کے مطابق اجلاس میں لاہور ہائی کورٹ کے فیصلے کے نفاذ کے لئے غور کیا جائے گا۔واضح رہے کہ اس سے قبل جمعہ کو ای سی پی کے اجلاس میں صدر مملکت عارف علوی کی جانب سے چیف الیکشن کمشنر کو پنجاب اور خیبرپختونخوا میں انتخابات کی تاریخ کے اعلان کے لیے لکھے گئے خط پر غور کیا گیا تھا۔اس اجلاس میں وزارت خزانہ کی جانب سے کمزور معاشی صورتحال کے پیش نظر فنڈز کی فراہمی سے انکار کی وجہ سے انتخابی عمل کے لیے فنڈز کی کمی کا مسئلہ اٹھایا جبکہ اجلاس میں پنجاب اور خیبرپختونخوا کے چیف سیکریٹریز اور پولیس سربراہوں کی جانب سے بیان کئے گئےسیکیورٹی خدشات پر بھی تبادلہ خیال کیا گیا۔
