ٹانک (نئی تازہ رپورٹ) پولیس نے ٹانک کے تھانہ گومل پر دہشت گردوں کے حملے کی کوشش ناکام بنا تے ہوئے شدید فائرنگ کے تبادلہ کے بعد حملہ آوروں کو فرار ہونے پر مجبور کر دیا۔
میڈیا رپورٹ کے مطابق خیبر پختونخواکے ضلع ٹانک کے تھانہ گومل پر رات دس بجے کے قریب 10 سے 15 دہشت گردوں نے حملے کی نیت سے پیش قدمی کی۔ سرکاری ذرائع کے مطابق پولیس کو دہشت گردوں کی مشکوک نقل و حرکت کا جدید ٹیکنالوجی سے علم ہوا اور پولیس نے فوری اور بھرپور ردعمل دیا۔ اس دوران دہشت گردوں کے ساتھ تقریباً 15 منٹ تک شدید فائرنگ کا تبادلہ ہو تا رہا ، پولیس ایکشن پر دہشت گردوں نے پیش قدمی روک دی۔ذرائع نے بتا یا کہ پولیس کی بھرپور کارروائی پر دہشت گرد پسپا ہوکر بھاگنے پر مجبور ہوگئے، اس دوران پولیس کا کوئی جانی نقصان نہیں ہوا اور تمام اہلکار ز محفوظ رہے۔
آئی جی خیبرپختونخوااختر حیات نے پولیس ستیشن گومل کے ایس ایچ او سے ٹیلی فون پر رابطہ کیا اورپولیس کی طرف سے بہادری کے ساتھ دہشت گردوں کے حملے کو ناکام بنانے پر اہلکاروں کو سراہا اورپچاس ہزار روپے نقد انعام کے ساتھ انہیں تعریفی اسناد دینے کا اعلان کیا۔
