اسلام آباد(نئی تازہ رپورٹ) انسدادِ دہشت گردی عدالت نے چیئرمین پی ٹی آئی عمران خان کی طبی بنیادوں پر حاضری سے استثنیٰ کی درخواست مسترد کر تے ہوئے طلبی کا سمن جاری کر دیا۔ اسلام آباد کی انسداد دہشتگردی کی عدالت کے جج راجہ جواد عباس حسن نے عمران خان کے خلاف کارِ سرکار میں مداخلت کے کیس کی سماعت کی، اس موقع پر سابق وزیراعظم عمران خان کے وکیل بابر اعوان اور پراسیکیوٹر عدالت میں پیش ہوئے۔
تحریک انصاف کے چیئرمین عمران خان کے وکیل بابر اعوان نے کہا کہ عمران خان زخمی ہیں جس کے باعث پیش نہیں ہو سکتے۔ انہوں نے طبی بنیادوں پر عمران خان کی حاضری سے استثنیٰ کی درخواست بھی کی، عدالت نے کہا کہ عمران خان کی زمان پارک سے ایک ویڈیو جاری ہوئی جس میں وہ پیدل چلتے نظر آئے۔عدالت نے بابر اعوان سے کہا کہ آپ مستقل ضمانت پر دلائل دیں، وہ 15 فروری کو آئیں یا نہ آئیں ہم ضمانت پر فیصلہ دے دیں گے۔ دلائل کے بعد عدالت نے عمران خان کی حاضری سے استثنیٰ کی درخواست مسترد کرتے ہوئے ان کی15 فروری کو طلبی کے سمن جاری کر دیئے۔
