لندن(نئی تازہ رپورٹ) چیف آف آرمی اسٹاف جنرل سید عاصم منیر اہم کانفرنس میں شرکت اور دفاعی معاملات پر تبادلہ خیال کے لئے 5 روزہ دورے پر برطانیہ پہنچ گئے۔
آرمی چیف جنرل عاصم منیر ولٹن پارک کی کانفرنس میں شرکت کے لیے لندن پہنچے ہیں، یہ ایک ایگزیکٹو ایجنسی ہے جسے یوکے فارن کامن ویلتھ اینڈ ڈیولپمنٹ آفس نے حکومتوں کے درمیان بات چیت کو فروغ دینے کے لیے قائم کیا ہے۔میڈیا رپورٹ کے مطابق پاک فوج کے سربراہ دفاعی معاملات سے متعلق اجلاسوں میں شرکت اور دفاعی حکام اور برطانوی ہم منصب سے ملاقاتیں کریں گے۔
ولٹن پارک نے اس سے قبل کئی اہم کانفرنسوں کا انعقاد کیا ہے جو جنوبی ایشیا میں ترقی اور سلامتی، دہشت گردی اور سابق فاٹا میں حکومتی ڈھانچے کے ساتھ ساتھ پاکستان میں پالیسیوں کے نفاذ کے موضوعات پر تھیں۔یہ کانفرنس ایک محدود پروگرام ہے، جس میں صرف برطانیہ اور پاکستانی حکام کے ایک منتخب گروپ کے ساتھ ساتھ کچھ ماہرین تعلیم شریک ہو رہے ہیں۔
