اسلام آباد ( نئی تازہ رپورٹ) وزیراعظم شہباز شریف نےاہم قومی چیلنجز پر 7 فروری کو کل جماعتی کانفرنس (اے پی سی ) طلب کرتے ہوئے عمران خان سمیت پوری سیاسی قیادت کو مدعو کر لیا۔ وزیراعظم آفس کے مطابق وزیراعظم شہباز شریف کی طرف سے بلائی گئی اے پی سی اسلام آباد میں ہوگی ۔ جس میں شرکت کے لئے تمام قومی سیاسی قائدین کو باضابطہ دعوت دے دی گئی ہے۔ وفاقی وزیر سردار ایاز صادق نے سابق سپیکر قومی اسمبلی پی ٹی آئی رہنما اسد قیصر اور سابق وزیردفاع پرویز خٹک سے رابطہ کیا۔ایاز صادق نے اسد قیصر اور پرویز خٹک کو وزیراعظم کی طرف سے عمران خان کو اے پی سی میں شرکت کی دعوت پہنچائی۔وزیراعظم نے پشاور میں ہونے والے ایپکس کمیٹی کے اجلاس میں پی ٹی آئی کے دو نمائندوں کو بھی شرکت کی دعوت دی ہے۔
اس حوالے سے ایاز صادق نے وزیراعظم کا پیغام اسد قیصر اور پرویز خٹک کو پہنچا دیا۔ ایاز صادق نے پی ٹی آئی رہنماؤں کو اپنی جماعت کے نامزد نمائندوں کے ناموں سے آگاہ کرنے کی درخواست کی۔گورنر ہاؤس پشاور میں ایپکس کمیٹی کے اجلاس میں تمام سٹیک ہولڈرز، پولیس، رینجرز اور حساس اداروں کے اعلیٰ افسران شریک ہوں گے۔اجلاس میں پشاور پولیس لائنز کی مسجد میں ہونے والے دہشت گردی کے واقعہ پر غور ہوگا۔ایپکس کمیٹی دہشت گردی کے خاتمے، سی ٹی ڈی اور پولیس کی اپ گریڈیشن کے اقدامات پر غور کرے گی۔
