اسلام آباد( نئی تازہ رپورٹ) جوڈیشل مجسٹریٹ کی عدالت نے الیکشن کمیشن کے خلاف نفرت پھیلانے کے کیس میں پی ٹی آئی رہنما فواد چوہدری کو جوڈیشل ریمانڈ پر جیل بھجوادیا۔ پیر کو ڈسٹرکٹ اینڈ سیشن کورٹ میں پاکستان تحریک انصاف کے رہنما فواد چوہدری کو جسمانی ریمانڈ مکمل ہونے پرپیش کیا گیا۔جوڈیشل مجسٹریٹ وقاص احمد راجا نے سماعت کی۔ فواد چوہدری نے بتایا کہ 6 دنوں میں ڈھائی گھنٹے سے زیادہ نہیں سو سکا، مجھے سردی میں گاڑی کے پیچھے ڈالے پر بٹھایا گیا۔ فریقین کے دلائل سننے کے بعد عدالت نےفواد چوہدری کو جوڈیشل ریمانڈ پر جیل بھجوانے کا حکم دیا۔
فواد چوہدری کی اہلیہ حبا چوہدری نےعدالت کے باہر میڈیا سے گفتگو کرتے ہوئے کہا کہ فواد چوہدری سابق وفاقی وزیر ہیں ، انہیں لاکھوں لوگوں نے منتخب کیا، سیشن کورٹ نے حکم دیا کہ فواد چوہدری کو ان کے بچوں سے ملوایا جائے لیکن ایسا نہیں ہوا، میں یہاں کھڑی ہوں ، جتنا ظلم کرنا ہے کریں۔ چیف جسٹس مجھے انصاف دیں، میری التجا ہے کہ بچیوں کی خاطرمجھے انصاف دیا جائے۔
