اسلام آباد ( نئی تازہ نیوز) حکومت نے پیٹرول اور ڈیزل کی قیمت میں 35 روپے فی لیٹر اضافہ کر دیا۔وزیر خزانہ اسحاق ڈار نے پریس کانفرنس سے خطاب کرتے ہوئے کہا کہ پیٹرول کی قیمت میں 50 روپے فی لیٹر تک اضافے کی قیاس آرائیاں کی جا رہی ہیں، 4 ماہ میں ایک مرتبہ بھی پیٹرولیم مصنوعات کی قیمت نہیں بڑھائی بلکہ پیٹرول اور ڈیزل کی قیمت میں تقریباً 20 روپے تک کی کمی کی گئی جبکہ مٹی کے تیل اور لائٹ ڈیزل کی قیمت میں 29 اور 30 روپے کمی کی گئی۔ انہوں نے کہا پیٹرولیم مصنوعات کی مصنوعی قلت کی خبریں سامنے آئیں، عالمی منڈی میں پیٹرولیم مصنوعات کی قیمتوں میں تقریباً 11 فیصد تک کا اضافہ ہو گیا ہے، ہمیں ان سب چیزوں کو سامنے رکھنا پڑے گا۔اسحاق ڈار نے کہا کہ اوگرا کی جانب سے تجویز پیش کی گئی کہ پیٹرولیم مصنوعات کی مصنوعی قلت ختم کرنے کے لیے قیمتوں میں اضافہ کیا جائے۔
انہوں نے کہا کہ وزیر اعظم شہباز شریف کی ہدایت اور اسٹیٹ بینک کی جانب سے جاری کردہ روپے کی قدر کے اعداد و شمار کو مد نظر رکھتے ہوئے پیٹرول اور ڈیزل کی قیمت میں 35، 35 روپے فی لیٹر جبکہ لائٹ ڈیزل اور مٹی کے تیل کی قیمت میں 18، 18 روپے فی لیٹر اضافے کا فیصلہ کیا ہے۔وزیر خزانہ نے کہا کہ پیٹرول کی نئی قیمت 249 روپے 80 پیسے جبکہ ہائی اسپیڈ ڈیزل کی فی لیٹر قیمت 262 روپے 80 پیسے فی لیٹر ہو گی۔ اسی طرح مٹی کا تیل 189 روپے 83 پیسے فی لیٹر اور لائٹ ڈیزل آئل 187 روپے فی لیٹر میں دستیاب ہو گا۔وزیر خزانہ اسحاق ڈار کا کہنا ہے پیٹرولیم مصنوعات کی قیمتیں اتوار کی صبح 11 بجے سے نافذ ہوں گی۔
