کراچی ( نئی تازہ رپورٹ). دوستی کا جھانسہ دے کر شہریوں کےاغوا برائے تاوان میں ملوث خاتون پکڑی گئی جبکہ پولیس نے مغوی کو بازیاب کرالیا۔ رپورٹ کے مطابق اینٹی وائلنٹ کرائم سیل( اے وی سی سی) نے خفیہ اطلاع پر کارروائی کرتے ہوئے بلدیہ سعید آباد میں چھاپہ مار کر اغوا برائے تاوان میں ملوث ایک خاتون کو گرفتارکرلیا جبکہ ریاض علی نامی مغوی کو بازیاب کرالیا ۔پولیس کے مطابق 7 جنوری کو ریاض علی کے اغوا کا مقدمہ درج کیا گیا تھا.ملزمان نے مغوی کی رہائی کیلئے ڈیڑھ کروڑ روپے تاوان کا مطالبہ کیا تھا۔
گرفتار ملزمہ نے ابتدائی تفتیش میں اعتراف کیا ہے کہ ریاض علی کو دوستی کا جھانسہ دیکر بلانے اور بعدازاں اغوا کی واردات انجام دینے میں ملوث ہے، ملزمہ نے بتایا کہ وہ موبائل فون پر لوگوں کو دوستی کا جھانسہ دے کر مختلف کرائے کی جگہوں پر بلواتی تھی اور مکان میں پہلے سے موجود دیگر ساتھیوں کی مدد سے اغوا کی واردات انجام دیتی تھی۔ملزمہ لینڈ مافیا کی مدد سے مختلف پلاٹوں پر قبضہ میں بھی ملوث بتائی گئی ہے جس کا نام ابھی ظاہر نہیں کیا گیا۔ جبکہ خاتون کے ساتھ شامل دیگر 4 اغوا کاروں کو پولیس تلاش کر رہی ہے۔
