لاہور( نئی تازہ رپورٹ )پاکستان تحریک انصاف کے چیئرمین اور سابق وزیراعظم عمران خان نے کہا ہے کہ مجھے راستے سے ہٹانے کیلئے اب پلان سی بن گیا ہے، میرے قتل کی نئی سازش کے پیچھے آصف زرداری ہیں، ویڈیو لنک کے ذریعے خطاب کرتے ہوئے عمران خان نے کہا کہ پلان اے میں چارلوگوں نے بند کمرے میں میرے قتل کی سازش تیار کی، پلان بی کے مطابق مجھے مذہبی انتہا پسندی کے نام پرمروانا تھا، پلان بی اور پلان اے میں ناکامی کے بعداب پلان سی بنایا گیا ہے، انہوں نے الزام عائد کیا کہ پلان سی میں 4 لوگوں کے علاوہ آصف زرداری بھی شامل ہیں، زرداری نے سندھ حکومت کا پیسہ ایک دہشت گرد تنظیم کو دیا ہے۔
چیئرمین تحریک انصاف نے کہا کہ قوم کو اس لیے بتا رہا ہوں کہ اگر مجھے کچھ ہوا تو آپ کو پتا ہو کہ وہ لوگ کون ہیں، ان لوگوں کا مقصد ہے کسی طرح عمران خان کو راستے سے ہٹایا جائے، ان چارلوگوں کو بچانے کی کوشش کی جا رہی ہے، ان کو خوف ہے کہ جنہوں نے سازش کی کہیں ان کا پتا نہ چل جائے، ساری قوم عدلیہ کی طرف دیکھ رہی ہے، یہ فیصلہ کن وقت ہے۔
سابق وزیراعظم نے معاشی بدحالی کو رجیم چینج کا نتیجہ قرار دیتے ہوئے کہا کہ پاکستان ڈیفالٹ کے قریب پہنچ گیا ہے، امپورٹڈ حکمرانوں کو ریلیف دینے کیلئے نہیں لایا گیا، مہنگائی بلند ترین سطح پر پہنچ گئی ہے، جبکہ بے روزگاری مسلسل بڑھ رہی ہے، ڈالر کی قیمت میں حالیہ اضافے سے نیا طوفان آئے گا، گیس اور پٹرول سمیت ہر چیز کی قیمتوں میں اضافہ ہوگا، چیئرمین پی ٹی آئی نے کہا کہ سیاست دان، صحافی سمیت اداروں میں لوگ بے نقاب ہوگئے ہیں، شہباز شریف، اسحاق ڈار کتنا بڑا جنیئس تھا سب کو پتا چل گیا ہے۔
عمران خان نے کہا کہ یہ عوام سے ڈرے ہوئے ہیں اس لئے انہیں الیکشن، آئین اور قانون کی حکمرانی کی فکر نہیں، جیسے ہی مشکل وقت آئے گا یہ ملک سے بھاگ جائیں گے، انہوں نے کہا کہ نگران حکومت پاکستانی قوم اور آئین کی توہین ہے، آئین میں واضح ہے کہ 90 دن کے اندر الیکشن ہونے ہیں، اگر الیکشن نہیں کروائیں گے تو سیدھا آرٹیکل 6 لگتا ہے۔چیئرمین پی ٹی آئی نے کہا کہ عدلیہ سے کہہ رہا ہوں کہ قوم آپ کی طرف دیکھ رہی ہے، اگر آپ ہمارے حقوق کا دفاع نہیں کریں گے تو پاکستان بنانا ری پبلک بن جائے گا، عوام کے لئے یہ فائنل حقیقی آزادی کی جنگ ہے۔
