پنجاب کی اوپن مارکیٹ میں گندم کی قیمت ملکی تاریخ میں پہلی بار 4100 روپے فی من تک پہنچ گئی
محکمہ خوراک پنجاب نے سرکاری آٹا کی سپلا ئی جاری رکھنے اور گندم کی قیمتوں کو مزید بڑھنے سے روکنے کیلیے فلورملز کے گندم کوٹہ میں2400 ٹن یومیہ اضافہ کردیا ہے۔
فلورملز کو یومیہ18600ٹن کی بجائے اب21ہزار ٹن گندم فراہم کی جائے گی جس سے یومیہ سرکاری آٹا سپلائی میں96ہزار تھیلوں کا اضافہ ہوگا۔ ادھر پنجاب حکومت کو وفاق کی جانب سے فراہم کردہ امپورٹڈ گندم محکمہ خوراک کے گوداموں میں پہنچنا شروع ہو گئی۔
کراچی بندرگاہ پہنچنے والے پہلے جہاز کی 64ہزار ٹن میں سے 32 ہزار ٹن پنجاب میں پہنچ چکی ہے جبکہ64 ہزار ٹن گندم لیکر روس سے آنے والا دوسرا جہاز بھی بندرگاہ پرپہنچ چکا ہے۔
گزشتہ روز لاہور میں نجی گندم کی قیمت4ہزار روپے فی من جبکہ راولپنڈی اسلام آباد میں4100 روپے فی من تک تھی ۔یہ ملکی تاریخ میں نجی گندم کی قیمت کا نیا ریکارڈ ہے ،اس بڑے اضافہ کی وجہ سے اوپن مارکیٹ میں نجی گندم کے دستیاب ذخائر میں نمایاں کمی دیکھی گئی ہے۔
