جوڈیشل کمیشن نے لاہور ہائی کورٹ کے جسٹس علی باقر نجفی کو سپریم کورٹ کا جج مقرر کرنے کی منظوری دے دی ہے۔
میڈیا رپورٹس کے مطابق چیف جسٹس آف پاکستان یحیٰ آفریدی کی زیرِ صدارت جوڈیشل کمیشن کا ڈھائی گھنٹے طویل اجلاس منعقد ہوا، جس میں جسٹس علی باقر نجفی کی سپریم کورٹ میں تعیناتی کی منظوری دی گئی۔ ذرائع کے مطابق یہ منظوری اکثریتی ووٹوں کی بنیاد پر دی گئی۔
اجلاس کے دوران دیگر اہم فیصلے بھی کیے گئے۔ جسٹس ریٹائرڈ مقبول باقر کو سندھ سے جبکہ بلوچستان ہائیکورٹ سے جسٹس ریٹائرڈ نذیر لانگو کو جوڈیشل کمیشن کا رکن تعینات کرنے کی منظوری دی گئی۔
اسلام آباد ہائی کورٹ سے سابق جسٹس شوکت عزیز صدیقی اور پشاور ہائی کورٹ سے سابق جسٹس شاکر اللہ جان کو بھی جوڈیشل کمیشن کا رکن مقرر کرنے کی منظوری دی گئی۔
ذرائع کے مطابق کمیشن نے متفقہ طور پر جسٹس شجاعت علی خان سے متعلق سابقہ ریمارکس حذف کرنے کی منظوری بھی دی۔ اجلاس کے حوالے سے بتایا گیا ہے کہ پاکستان تحریک انصاف (پی ٹی آئی) کے دو اراکین نے جسٹس علی باقر نجفی کی تقرری کی حمایت میں ووٹ دیا، اور جسٹس شجاعت علی خان کے خلاف ریمارکس حذف کرنے کے فیصلے کی بھی تائید کی۔
