اسلام آباد: سپریم کورٹ نے گلگت بلتستان میں ججز کی تقرریوں پر عائد حکم امتناع ختم کر دیا۔
سپریم کورٹ میں گلگت بلتستان میں ججز کی تقرریوں سے متعلق درخواستوں کی سماعت ہوئی۔
اٹارنی جنرل نے عدالت کو بتایا کہ حکومت ججز کی تقرریاں آرڈر 2018 کے تحت کرے گی، اور اس حوالے سے ایڈووکیٹ جنرل گلگت بلتستان سے مشاورت کی جا چکی ہے۔
جسٹس جمال مندوخیل نے ریمارکس دیے کہ اٹارنی جنرل صاحب، تقرریوں میں ناانصافی نہیں ہونی چاہیے، بصورت دیگر مسائل پیدا ہوں گے۔
جسٹس محمد علی مظہر نے کہا کہ ہمیں ججز تقرریوں کا مقدمہ نمٹانا چاہیے۔
دورانِ سماعت گلگت بلتستان حکومت نے ججز کے تقرری کے طریقہ کار سے متعلق دائر درخواست واپس لے لی۔
بعد ازاں اٹارنی جنرل پاکستان اور ایڈووکیٹ جنرل گلگت بلتستان کے درمیان ججز کی تقرری کے طریقہ کار پر اتفاق ہو گیا، جس کے بعد عدالت نے حکم امتناع ختم کر دیا۔
عدالت نے گلگت بلتستان میں تقرریوں سے متعلق دیگر درخواستوں کی سماعت تین ہفتوں کے لیے ملتوی کر دی۔
