متحدہ عرب امارات میں عید الفطر کی تعطیلات کا باضابطہ اعلان کر دیا گیا۔
میڈیا رپورٹ کے مطابق وفاقی اتھارٹی برائے سرکاری انسانی وسائل نے ایک سرکلر جاری کیا ہے، جس میں بتایا گیا ہے کہ وفاقی حکومت کے شعبوں کے لیے عید الفطر کی چھٹیاں یکم سے 3 شوال تک ہوں گی، جبکہ سرکاری دفاتر 4 شوال سے دوبارہ کھلیں گے۔
رپورٹ میں مزید کہا گیا ہے کہ اگر رمضان المبارک 30 دن کا ہوا تو 30 رمضان کو اضافی چھٹی دی جائے گی، جس سے عید کی تعطیلات میں اضافہ ہو جائے گا۔
اگر شوال کا چاند 29 مارچ، ہفتہ کی شام نظر آ گیا تو عید الفطر 30 مارچ، اتوار کو منائی جائے گی، اور اتوار عید کا پہلا دن ہوگا۔
تاہم، اگر ہفتہ کی شام چاند نظر نہ آیا تو رمضان کے 30 روزے مکمل ہوں گے، اور عید الفطر پیر، 31 مارچ سے شروع ہوگی۔ اس صورت میں، ہفتے سے شروع ہونے والی تعطیلات بدھ، 2 اپریل تک جاری رہیں گی، جس کے نتیجے میں 5 دن کا طویل ویک اینڈ ملے گا۔
