محکمہ داخلہ پنجاب نے نادرا کو ہدایت کی ہے کہ وہ تمام اسلحہ لائسنسز کی آن لائن تصدیق کے لیے کیو آر کوڈ جاری کرے۔ ترجمان سیکرٹری داخلہ پنجاب کے مطابق اس کیو آر کوڈ کے ذریعے قانون نافذ کرنے والے ادارے ہر اسلحہ لائسنس کی تصدیق کر سکیں گے۔
سیکرٹری داخلہ پنجاب کی زیرِ صدارت اسلحہ لائسنس کی تصدیق سے متعلق ایک اہم اجلاس منعقد ہوا، جس میں سپیشل سیکرٹری داخلہ فضل الرحمان، ایڈیشنل سیکرٹری داخلہ جوڈیشل عمران حسین رانجھا اور نادرا حکام نے شرکت کی۔ اجلاس میں نادرا کو ہدایت دی گئی کہ تمام اسلحہ لائسنسز کو ایک ہفتے کے اندر کیو آر کوڈ سے منسلک کیا جائے اور انہیں متعلقہ افراد کے شناختی کارڈز سے لنک کیا جائے۔ پنجاب بھر کے کمشنرز اور ڈپٹی کمشنرز کو بھی تمام اسلحہ لائسنس سے متعلق احکامات پر کیو آر کوڈ شامل کرنے کی ہدایت کی گئی ہے۔
ترجمان کے مطابق اس عمل سے جعلی لائسنسز کا خاتمہ ممکن ہوگا، جبکہ سنگین جرائم میں ملوث افراد کو اسلحہ لائسنس کے حصول سے نااہل قرار دیا جائے گا۔ مزید برآں، آرمز رولز میں ترامیم کے ذریعے شہریوں کے لیے آسانیاں پیدا کی جا رہی ہیں، اور انفرادی و تجارتی اسلحہ لائسنس کے قوانین کو عام فہم بنایا جا رہا ہے۔ اس کے علاوہ، اسلحہ لائسنس کی تصدیق کے عمل میں ڈائریکٹوریٹ آف مانیٹرنگ کا کردار مزید مؤثر بنایا جا رہا ہے۔
اجلاس میں اسلحہ لائسنس کے اجرا اور تجدید کے لیے فیسوں کے نئے شیڈول کی سفارش بھی کی گئی، جبکہ مینوئل لائسنسز کی کمپیوٹرائزیشن کے تمام مراحل کی نگرانی جاری ہے۔
