کراچی میں مکان کی چھت گرنے کے المناک حادثے میں ایک ہی خاندان کے چھ افراد جاں بحق ہو گئے۔
ریسکیو ذرائع کے مطابق، حادثہ گلشن معمار کے علاقے افغان بستی میں پیش آیا، جہاں زیر تعمیر چھت گرنے سے چار بچیاں اور دو خواتین جاں بحق ہو گئیں، جبکہ چار افراد زخمی ہوئے۔ جاں بحق افراد گھر میں مہمان تھے، اور حادثے کے وقت چھت پر تعمیراتی کام جاری تھا۔
اطلاعات کے مطابق چھت کی مضبوطی کا کام کیا جا رہا تھا کہ اچانک تعمیراتی سامان کا وزن برداشت نہ کرپانے سے چھت نیچے گر گئی۔
انتظامیہ کا کہنا ہے کہ ریسکیو اہلکاروں نے جاں بحق افراد کی لاشیں اور زخمیوں کو فوری طور پر ہسپتال منتقل کر دیا۔
وزیراعلیٰ سندھ سید مراد علی شاہ نے واقعے پر گہرے دکھ اور افسوس کا اظہار کرتے ہوئے لواحقین سے تعزیت کی۔ انہوں نے متاثرہ خاندانوں سے ہمدردی کا اظہار کرتے ہوئے جاں بحق افراد کی مغفرت اور پسماندگان کے لیے صبر جمیل کی دعا کی۔
