لاہور:علامہ اقبال انٹرنیشنل ایئرپورٹ پر ایف آئی اے نے جعلی سفری دستاویزات کے ذریعے بیرون ملک جانے کی کوشش کرنے والے دو مسافروں کو گرفتار کر لیا۔
مدثر علی قطر ایئرویز کی پرواز QR-621 سے اٹلی جبکہ ذیشان کھوکھر امارات ایئر لائن کی پرواز EK-625 کے ذریعے ساؤتھ افریقہ جانے والا تھا۔ امیگریشن کلیئرنس کے دوران دونوں مسافروں کی دستاویزات مشکوک پائی گئیں، جس پر تفتیش کے دوران ان کے پاسپورٹ پر جعلی ویزے پائے گئے۔
ابتدائی تحقیقات میں انکشاف ہوا کہ ملزمان نے یہ جعلی ویزے ایجنٹوں سے بھاری رقوم کے عوض حاصل کیے۔ ذیشان کھوکھر نے اٹلی کا جعلی ویزا 27 لاکھ روپے میں عثمان نامی ایجنٹ سے لیا تھا۔ گرفتار افراد کو مزید تفتیش کے لیے انسدادِ انسانی اسمگلنگ سرکل لاہور منتقل کر دیا گیا ہے۔
ایف آئی اے کے ترجمان نے عوام سے اپیل کی ہے کہ وہ اپنی سفری دستاویزات غیر متعلقہ افراد کے سپرد نہ کریں اور ویزا حاصل کرنے کے لیے صرف متعلقہ ملک کی ایمبیسی یا نامزد ویزا ایپلیکیشن سینٹر سے رجوع کریں۔
