اسلام آباد ( نئی تازہ نیوز) لاہور ہائی کورٹ میں مزید ججوں کی تقرری کے حوالے سے جوڈیشل کمیشن آف پاکستان کا اجلاس کل جمعہ کو ہوگا، جس کی صدارت چیف جسٹس یحییٰ آفریدی کریں گے۔
اجلاس میں لاہور ہائی کورٹ میں ایڈیشنل ججوں کی تعیناتی کے لیے آٹھ سیشن ججوں کے ناموں پر غور کیا جائے گا۔ ان میں راجا غضنفر علی خان، قیصر نذیر بٹ، اکمل خان، تنویر احمد شیخ، جزیلہ اسلم، طارق محمود باجوہ، شاہدہ سعید اور اکبر گل خان شامل ہیں۔
اس سے قبل، 6 فروری کو ہونے والے جوڈیشل کمیشن کے اجلاس میں لاہور ہائی کورٹ کے لیے 9 ایڈیشنل ججوں کی تقرری کی منظوری دی گئی تھی، جس کے لیے 49 نام زیر غور آئے تھے۔
کمیشن کی اکثریتی رائے سے حسن نواز مخدوم، سردار اکبر علی، ملک جاوید اقبال وینس، ملک وقار حیدر، سید احسن کاظمی، محمد جواد ظفر، خالد اسحاق، ملک اویس خالد اور سلطان محمود کو ایڈیشنل جج مقرر کیا گیا تھا۔
بعد ازاں لاہور ہائی کورٹ کی چیف جسٹس عالیہ نیلم نے ان ایڈیشنل ججوں سے حلف لیا تھا۔
