کراچی:محکمہ اسکول ایجوکیشن نے رمضان المبارک کے پیش نظر سندھ میں میٹرک اور انٹرمیڈیٹ کے سالانہ امتحانات کی تاریخوں میں تبدیلی کر دی ہے۔
اسٹیئرنگ کمیٹی کی سب کمیٹی کے اجلاس میں کیے گئے فیصلے کے مطابق، کراچی سمیت سندھ بھر میں نویں اور دسویں جماعت ( میٹرک) کے سالانہ امتحانات اب عید کے بعد 7 اپریل 2025 سے 25 اپریل 2025 تک منعقد کیے جائیں گے، جبکہ اسکولوں میں عملی امتحانات (پریکٹیکلز) 10 مارچ سے شروع ہوں گے۔
واضح رہے کہ پہلے جاری شدہ شیڈول کے تحت میٹرک کے امتحانات 15 مارچ سے ہونا تھے، لیکن رمضان المبارک کے پیش نظر ان تاریخوں میں رد و بدل کیا گیا ہے۔ اسی طرح انٹرمیڈیٹ (فرسٹ ایئر اور سیکنڈ ایئر) کے امتحانات بھی نئے شیڈول کے مطابق 28 اپریل 2025 سے شروع ہوں گے، جبکہ پہلے یہ 15 اپریل کوشیڈول تھے۔
