اسلام آباد ( نئی تازہ نیوز) خیبر پختونخوا کے وزیرستان بلاک میں گیس اور تیل کے نئے ذخائر دریافت کر لیے گئے ہیں۔ جو مقامی سطح پر قدرتی وسائل کی دریافت میں اہم پیشرفت ہے ۔
میڈیا رپورٹ کے مطابق سپنوام ون کنویں سے 12.96 ملین کیوبک فٹ گیس اور 20 بیرل خام تیل حاصل ہوا ہے۔
واضح رہے کہ کنویں کی کھدائی کا آغاز 28 مئی 2024 کو کیا گیا تھا، جبکہ وزیرستان بلاک میں یہ دریافت ماڑی انرجیز نے کی ہے۔
ماڑی انرجیز کے مطابق وہ وزیرستان بلاک میں آپریٹر کمپنی کے طور پر کام کر رہی ہے اور اس بلاک میں 55 فیصد شیئرز کی مالک ہے، جبکہ جوائنٹ وینچر میں او جی ڈی سی ایل اور او پی آئی بھی شامل ہیں۔
کمپنی کا کہنا ہے کہ یہ دریافت ملک کے ہائیڈرو کاربن وسائل میں اضافے میں معاون ثابت ہوگی، اور وہ نئے وسائل کی تلاش اور دریافت کے لیے پرعزم ہے۔
ماڑی انرجیز نے قومی سلامتی کے اداروں، وفاقی اور صوبائی حکومت کے تعاون پر اظہارِ تشکر کیا ہے۔
