اسلام آباد ( نئی تازہ رپورٹ) رمضان المبارک کے چاند سے متعلق سپارکو کی اہم پیش گوئی سامنے آئی ہے۔ پاکستان اسپیس اینڈ اپر ایٹموسفیئر ریسرچ کمیشن (سپارکو) کے ترجمان کے مطابق رمضان 1146 ہجری کا نیا چاند 28 فروری 2025 کو پاکستان کے معیاری وقت کے مطابق 5 بج کر 45 منٹ پر پیدا ہوگا۔ غروب آفتاب کے وقت چاند کی عمر 12 گھنٹے اور بلندی 5 ڈگری ہوگی، جس کی وجہ سے اس کا نظر آنا مشکل ہوگا۔
سپارکو کے مطابق 28 فروری کو چاند اور سورج کے درمیان زاویے کا فاصلہ 7 ڈگری ہوگا، جس کے باعث انسانی آنکھ سے چاند کا نظر آنا ممکن نہیں۔ ان عوامل کو مدنظر رکھتے ہوئے، پاکستان میں رمضان المبارک کا چاند یکم مارچ کی شام نظر آ سکے گا اس طرح پہلا روزہ 2 مارچ 2025 کو ہونے کا امکان ہے۔
سپارکو کے مطابق عرب امارات. سعودی عرب اور بعض خلیجی ممالک میں 28 فروری کو ہلال رمضان نظر آنے کا امکان ہے، جس کے نتیجے میں وہاں رمضان کا آغاز یکم مارچ کو ہوسکتا ہے۔ اسی طرح وہاں شوال کا چاند 30 مارچ کو دکھائی دینے کا امکان ہے، جس کے تحت عید الفطر 31 مارچ کو منائی جا سکتی ہے۔
سپارکو کے ترجمان نے واضح کیا کہ پاکستان میں رمضان اور عید الفطر کے چاند کی حتمی رویت کا فیصلہ رویت ہلال کمیٹی کرتی ہے۔
