اسلام آباد ( نئی تازہ رپورٹ) پیٹرولیم مصنوعات کی قیمتوں میں 16 فروری سے نمایاں کمی کا امکان ہے۔ اس حوالے سے انڈسٹری کی جانب سے تیل و گیس ریگولیٹری اتھارٹی (اوگرا) کو پیٹرولیم مصنوعات سے متعلق ورکنگ بھجوا دی گئی ہے۔
قیمتوں میں کمی عالمی مارکیٹ میں خام تیل کی قیمتوں میں ہونے والی تبدیلیوں کے تناسب سے متوقع ہے۔ انڈسٹری کی جانب سے بھیجی گئی ورکنگ کے مطابق ہائی اسپیڈ ڈیزل کی قیمت میں 9 روپے فی لیٹر جبکہ پیٹرول کی قیمت میں 2 روپے 50 پیسے فی لیٹر تک کمی کا امکان ہے۔
اسی طرح مٹی کے تیل کی قیمت میں 3 روپے سے زائد اور لائٹ ڈیزل کی قیمت میں 5 روپے سے زائد فی لیٹر تک کمی ہو سکتی ہے۔ اوگرا عالمی مارکیٹ کے رجحانات کے مطابق حتمی ورکنگ 15 فروری کو حکومت کو پیش کرے گا، جس کے بعد وزیراعظم شہباز شریف پیٹرولیم مصنوعات کی نئی قیمتوں بارے حتمی منظوری دیں گے۔
وزارت خزانہ آئندہ 15 دنوں کے لیے پیٹرولیم مصنوعات کی نئی قیمتوں کا نوٹیفکیشن جاری کرے گی۔ نئی قیمتوں کا اطلاق 16 فروری سے ہو گا۔
