آزادکشمیر سپریم کورٹ نے سابق وزیراعظم سردار تنویر الیاس کی جانب سے توہین عدالت کے کیس میں معافی مانگنے پر ان کی نااہلی ختم کر دی۔ سپریم کورٹ نے سردار تنویر الیاس کو ایک ماہ بعد انتخاب میں حصہ لینے کے لئے اہل قرار دے دیا۔
نجی ٹی وی کی رپورٹ کے مطابق، سابق وزیراعظم آزادکشمیر سردار تنویر الیاس نے توہین عدالت کے مقدمے میں سپریم کورٹ سے معافی مانگ لی تھی، جس کے بعد سپریم کورٹ آزادکشمیر نے ان کے خلاف توہین عدالت کی کارروائی ختم کر دی۔ آزادکشمیر ہائیکورٹ کے فیصلے کے خلاف سردار تنویر الیاس کی اپیل بھی نمٹا دی گئی۔ یاد رہے کہ آزادکشمیر ہائی کورٹ نے سردار تنویر الیاس کو توہین عدالت کے الزام میں دو سال کے لیے نااہل قرار دے دیا تھا۔
سپریم کورٹ آزادکشمیر نے سردار تنویر الیاس کے خلاف توہین عدالت کی کارروائی ختم کرتے ہوئے انہیں ایک ماہ بعد انتخابات میں حصہ لینے کی اجازت دے دی۔
یاد رہے کہ اپریل 2023 میں آزادکشمیر ہائی کورٹ نے سردار تنویر الیاس کو توہین عدالت کا مرتکب قرار دیتے ہوئے دو سال کے لیے نااہل کر دیا تھا، جس کے بعد ان کی وزارت عظمیٰ اور حکومت ختم ہو گئی تھی۔ سردار تنویر الیاس نے ہائی کورٹ کے فیصلے کے خلاف سپریم کورٹ میں اپیل دائر کی تھی، اور سپریم کورٹ کی جانب سے توہین عدالت کا نوٹس جاری ہونے پر انہوں نے عدالت سے معافی مانگ لی تھی۔
