اسلام آباد: پاکستان تحریک انصاف (پی ٹی آئی) کی رہنما اور ممبر قومی اسمبلی زرتاج گل کے ناقابل ضمانت وارنٹ گرفتاری منسوخ کر دیے گئے ہیں۔
ڈسٹرکٹ اینڈ سیشن کورٹ اسلام آباد کے سول جج مبشر حسن نے متعدد بار طلبی کے باوجود زرتاج گل کے عدالت میں پیش نہ ہونے پر ان کے ناقابل ضمانت وارنٹ گرفتاری جاری کیے تھے۔
تاہم وارنٹ گرفتاری کے اجرا کے بعد زرتاج گل عدالت میں پیش ہو گئیں اور اپنے وارنٹ گرفتاری منسوخ کرنے کی درخواست دائر کی۔
جج مبشر حسن نے کہا کہ چونکہ زرتاج گل خود عدالت میں پیش ہوئی ہیں، اس لیے ان کے وارنٹ گرفتاری منسوخ کیے جاتے ہیں۔ مزید برآں عدالت نے زرتاج گل کے خلاف کیس کی سماعت 12 مارچ تک ملتوی کر دی۔
واضح رہے کہ پی ٹی آئی کی رہنما زرتاج گل کے خلاف اسلام آباد کے تھانہ بارہ کہو میں مقدمہ درج ہے، جس میں پی ٹی آئی کے بانی عمران خان اور شاہ محمود قریشی بری ہو چکے ہیں۔
