صدر پاکستان آصف علی زرداری چین کے 5 روزہ سرکاری دورے پر روانہ ہوگئے، بیجنگ میں چینی صدر شی جن پنگ اور وزیراعظم لی چیانگ سے ملاقات ہوگی۔
میڈیا رپورٹ کے مطابق صدر مملکت آصف علی زرداری چین کے 5 روزہ سرکاری دورے پر روانہ ہوگئے ہیں۔ صدر کے ہمراہ نائب وزیراعظم و وزیر خارجہ اسحٰق ڈار، وفاقی وزیر داخلہ محسن نقوی، سینیٹر سلیم مانڈوی والا اور ڈاکٹر عاصم حسین بھی چین گئے ہیں۔
صدر مملکت اپنے دورے کے دوران بیجنگ میں چینی صدر شی جن پنگ اور وزیراعظم لی چیانگ سمیت دیگر اعلیٰ حکام سے ملاقات کریں گے۔ دونوں ممالک کے درمیان دوطرفہ تعلقات کے تمام پہلوؤں پر بات چیت کی جائے گی، جس میں معاشی اور تجارتی تعاون کو فروغ دینے کے ساتھ ساتھ چین پاکستان اقتصادی راہداری (سی پیک) کے موجودہ اور مستقبل کے منصوبوں پر بھی تبادلہ خیال ہوگا۔
اس کے علاوہ دونوں ممالک کے رہنما انسدادِ دہشت گردی، سیکیورٹی تعاون اور خطے میں امن و استحکام کے امور پر بھی غور کریں گے۔ صدر زرداری چینی حکومت کی خصوصی دعوت پر 9ویں ایشین ونٹر گیمز کی افتتاحی تقریب میں بھی شرکت کریں گے۔
