واشنگٹن: ریگن نیشنل ایئرپورٹ کے قریب ایک امریکی مسافر طیارہ اور یو ایس آرمی کا بلیک ہاک ہیلی کاپٹر فضا میں ٹکرا گئے، حکام نے تصدیق کر دی۔
حادثہ بدھ کی رات مقامی وقت کے مطابق 9 بجے پیش آیا، جب امریکن ایگل فلائٹ 5342 لینڈنگ کے لیے آ رہی تھی۔ پی ایس اے ایئرلائنز کے زیرِ انتظام یہ طیارہ 60 مسافروں اور 4 کریو ممبرز کو لے کر وِچِٹا، کینساس سے واشنگٹن، ڈی سی جا رہا تھا۔ دوسری جانب یو ایس آرمی کا سِکورسکی ایچ-60 بلیک ہاک ہیلی کاپٹر فورٹ بیلوائر ورجینیا سے روانہ ہوا تھا، جس میں تین فوجی سوار تھے۔
ٹکراؤ کے بعد مسافر طیارہ پوٹومیک دریا میں گر کر دو ٹکڑوں میں بٹ گیا، جبکہ ہیلی کاپٹر بھی قریب ہی پانی میں الٹا پایا گیا۔ ریسکیو ٹیمیں، جن میں غوطہ خور، فائر بوٹس اور دیگر ادارے شامل ہیں، امدادی کارروائیاں کر رہی ہیں۔ رات اور سخت سردی کی وجہ سے ریسکیو آپریشن میں مشکلات کا سامنا ہے۔
امریکی صدر ڈونلڈ ٹرمپ نے حادثے کو “خوفناک سانحہ” قرار دیتے ہوئے ریسکیو ٹیموں کی کوششوں کو سراہا۔ سینیٹر ٹیڈ کروز نے جانی نقصان کی تصدیق کی، لیکن تفصیلات فراہم نہیں کیں۔
فیڈرل ایوی ایشن ایڈمنسٹریشن (FAA) نے ریگن نیشنل ایئرپورٹ پر تمام پروازیں معطل کر دی ہیں۔ امریکن ایئرلائنز نے واقعے پر گہری تشویش کا اظہار کرتے ہوئے حکام کے ساتھ مکمل تعاون کی یقین دہانی کرائی ہے۔
