اسلام آباد ( نئی تازہ رپورٹ) وزیراعظم شہباز شریف نے کہا ہے کہ پاکستانی نوجوانوں میں زندگی کے ہر شعبے میں کامیابی حاصل کرنے اور پاکستان کا نام روشن کرنے کی بھرپور صلاحیت موجود ہے۔
یونیورسٹی آف لندن کی وائس چانسلر وینڈی تھامسن سے ملاقات میں وزیر اعظم نے کہا کہ پاکستانی طلباء یونیورسٹی آف لندن اور دیگر عالمی تعلیمی اداروں سے تعلیم حاصل کر کے عالمی مارکیٹ میں اپنی خدمات فراہم کر رہے ہیں۔
وزیراعظم نے کہا کہ حکومت پاکستان نے نوجوانوں کو میرٹ کی بنیاد پر بیرون ملک تعلیم اور ملازمت کے مواقع فراہم کرنے کے لیے متعدد اسکالرشپ پروگرام متعارف کرائے ہیں اور نئی حکمت عملیوں پر بھی کام جاری ہے۔
وزیراعظم نے کہا کہ ہم اپنے نوجوانوں کو عالمی سطح پر درکار مہارتوں سے لیس کرنے کے لیے پرعزم ہیں۔
اس موقع پر وینڈی تھامسن نے وزیراعظم محمد شہباز شریف کی جانب سے ملک میں تعلیم کے فروغ کے لیے اٹھائے گئے حالیہ اقدامات کو سراہا۔
ملاقات میں وزیر اطلاعات و نشریات عطا اللہ تارڑ، وفاقی وزیر اقتصاد ی امور احد خان چیمہ سمیت متعلقہ اداروں کے اعلیٰ افسران بھی موجود تھے۔
