واشنگٹن( نئی تازہ ڈیسک) وفاقی وزیر داخلہ محسن نقوی نے واشنگٹن میں کانگریس مین تھامس رچرڈ سوازی اور کانگریس مین جیک برگمین سے ملاقات کی۔ تھامس رچرڈ سوازی کا تعلق ڈیموکریٹک پارٹی جبکہ جیک برگمین ری پبلکن پارٹی سے ہیں۔ دونوں کانگریس اراکین، جو پاکستانی کاکس کے ممبر اور کوچیئر بھی ہیں، کے ساتھ ملاقات میں پاک-امریکہ تعلقات، باہمی دلچسپی کے امور اور افغانستان کی صورتحال پر تبادلہ خیال کیا گیا۔
ملاقات میں پاک-امریکہ تعلقات کو مزید فروغ دینے پر اتفاق ہوا، اور وزیر داخلہ نے دونوں کانگریس اراکین کو پاکستان کے دورے کی دعوت دی۔ اس موقع پر محسن نقوی نے کہا کہ امریکہ پاکستان کا اہم معاشی اور دفاعی شراکت دار ہے، اور سماجی شعبوں میں امریکی تعاون کو پاکستان قدر کی نگاہ سے دیکھتا ہے۔ انہوں نے مزید کہا کہ پاکستان امریکہ کے ساتھ دوطرفہ تعلقات کو خصوصی اہمیت دیتا ہے اور تمام شعبوں میں مزید اشتراک کا خواہاں ہے۔
کانگریس مین تھامس سوازی نے پاکستان کے ساتھ تعلقات مضبوط بنانے کے عزم کا اظہار کرتے ہوئے کہا کہ وہ جلد پاکستان کا دورہ کریں گے۔ ملاقات میں 30 اپریل کو واشنگٹن ڈی سی میں پاکستانی کاکس کانفرنس منعقد کرنے کا فیصلہ بھی کیا گیا۔ امریکہ میں پاکستان کے سفیر رضوان سعید شیخ بھی ملاقات کے دوران موجود تھے۔
