پاکستان اور چین کے تعلقات کو نئی بلندی تک پہنچاتے ہوئے نیو گوادر انٹرنیشنل ایئرپورٹ مکمل طور پر فعال ہوگیا، کراچی سے پی آئی اے کی پہلی پرواز گوادر ایئرپورٹ پر لینڈ کر گئی۔
کراچی سے پی کے 503 نیوگوادر انٹرنیشنل ایئرپورٹ پہنچی، افتتاحی پرواز کا رن وے پر واٹر کینن سلیوٹ کے ساتھ شاندار استقبال کیا گیا۔
وزیر دفاع و ہوا بازی خواجہ محمد آصف، گورنر اور وزیراعلیٰ بلوچستان نے پہلی کمرشل پرواز کا استقبال کیا اور مسافروں کو پھول پیش کئے۔
قبل ازیں ترجمان پی آئی اے نے بتایا کہ نیو گوادر انٹرنیشنل ایئرپورٹ کیلئے پہلی پرواز پی کے 503 کراچی سے 46 مسافروں کو لے کر 9 بج کر 50 منٹ پر روانہ ہوئی۔
نیو گوادر ایئرپورٹ کا 3.6 کلومیٹر طویل رن وے بڑے طیاروں کیلئے موزوں ہے، نیو گوادر ایئرپورٹ پر ایئر بس اور بوئنگ طیارے لینڈ کر سکیں گے، 430 ایکڑ پر مشتمل گوادر ایئرپورٹ رقبے کے لحاظ سے پاکستان کا سب سے بڑا ایئرپورٹ ہے۔
یاد رہے کہ نیو گوادر ایئرپورٹ سی پیک کا فلیگ شپ منصوبہ ہے، ایئرپورٹ پر جدید سکیورٹی انتظامات کئے گئے ہیں اور مسافروں کوبہترین سہولتیں دستیاب ہوں گی۔
