اسلام آباد ( نئی تازہ رپورٹ) بلوچستان ہائی کورٹ میں تین ایڈیشنل ججز کی تعیناتی کا نوٹیفکیشن جاری کر دیا گیا ہے۔
میڈیا رپورٹ کے مطابق صدر مملکت آصف علی زرداری کی منظوری کے بعد وزارت قانون نے نوٹیفکیشن جاری کیا۔
نوٹیفکیشن کے مطابق محمد آصف، محمد ایوب خان اور محمد نجم الدین مینگل کو بلوچستان ہائی کورٹ میں ایڈیشنل جج کے طور پر تعینات کر دیا گیا ہے۔
نوٹیفکیشن میں کہا گیا ہے کہ یہ تینوں ججز ایک سال کے لیے بلوچستان ہائی کورٹ میں اپنے فرائض سرانجام دیں گے۔
یاد رہے کہ ایک روز قبل ہونے والے جوڈیشل کمیشن کے اجلاس میں بلوچستان ہائی کورٹ کے ایڈیشنل ججز کے لیے محمد آصف ، نجم الدین مینگل اور محمد ایوب کے ناموں پر اتفاق کیا گیا تھا۔
اعلامیے میں کہا گیا کہ جوڈیشل کمیشن کے دوسرے اجلاس میں سپریم کورٹ کے ایڈووکیٹس محمد آصف اور محمد ایوب خان کو متفقہ طور پر ایڈیشنل ججز کے لیے نامزد کیا گیا، جبکہ کثرت رائے سے ایڈووکیٹ سپریم کورٹ محمد نجم الدین مینگل کے نام کی منظوری دی گئی۔
