چیئرمین پی ٹی آئی بیرسٹر گوہر علی خان نے آرمی چیف جنرل عاصم منیر سے ملاقات کی تصدیق کرتے ہوئے کہا ہے کہ سبراہ پاک فوج کے سامنے پی ٹی آئی کے تمام معاملات اور مطالبات رکھے ہیں۔
اڈیالہ جیل کے باہر میڈیا کے نمائندوں سے غیر رسمی گفتگو کرتے ہوئے چیئرمین پاکستان تحریک انصاف بیرسٹر گوہر خان نے کہا کہ پشاور میں میری اور علی امین گنڈا پور کی آرمی چیف سے ملاقات ہوئی ہے، سربراہ پاک فوج سے ملاقات خوش آئند ہے ۔
بیرسٹر گوہر نے کہا کہ ملاقات میں آرمی چیف کے سامنے پی ٹی آئی کے تمام معاملات اور مطالبات رکھے ہیں، امید ہےصورتحال اب بہتر ہو جائے گی، مذاکرات خوش آئند ہیں، میں شروع سے کہہ رہا تھا چیزیں بہتر ہونی چاہئیں ۔
چیئرمین پی ٹی آئی نے کہا کہ آرمی چیف کے ساتھ ملاقات میں ملکی استحکام کے حوالے سے تمام امور پر بات چیت ہوئی، جبکہ دوسری جانب سے بھی مثبت جواب ملا ہے۔
