فیصل آباد ( نئی تازہ مانیٹرنگ) تھانہ صدر تاندلیانوالہ پر مسلح ملزمان نے حملہ کر کے حوالات میں بند تین سگے بھائیوں کو قتل کر دیا۔
نجی ٹی وی نے پولیس ذرائع کے حوالے سے بتایا کہ قتل ہونے ہونے والوں میں بلال، عثمان اور ناصر شامل ہیں جبکہ آصف نامی ملزم زخمی ہوگیا ہے، ملزمان تھانہ سٹی تاندلیانوالہ میں درج مقدمہ نمبر1209/24 بجرم 302 ت پ میں ملزم تھے اور تھانہ صدر کی حوالات میں بند تھے۔
ترجمان پنجاب پولیس کے مطابق فائرنگ میں ملوث 6 مشتبہ افراد کو حراست میں لے لیا گیا ہے، قتل دیرینہ دشمنی کا شاخسانہ ہے، مقتولین پر کھرل برادری کے افراد کے قتل کا الزام تھا۔ ملزمان کی دیرینہ دشمنی کی وجہ سے سٹی کی بجائے تھانہ صدر تاندلیانوالہ میں بند کیا گیا تھا۔
پولیس کے مطابق ملزمان تھانہ کےعقب سے سیڑھی لگا کر تھانے میں داخل ہوئے تمام افسران کے کمروں کو باہر سے کنڈیاں لگائیں اور حوالات میں بند ملزمان پر اندھا دھند فائرنگ کردی جس سے حوالات میں موجود سکھیرا برادری کے تین بھائی جاں بحق ہوگئے جبکہ ایک شخص زخمی ہوا۔
پولیس کے مطابق ملزمان فرار ہونے میں کامیاب ہوگئے جبکہ اطلاع ملتے ہی سی پی او فیصل آباد سمیت پولیس کی بھاری نفری جائے وقوعہ پر پہنچ گئی۔
آئی جی پنجاب ڈاکٹر عثمان انور نے واقعہ کا نوٹس لیتے ہوئے آر پی او فیصل آباد سے رپورٹ طلب کرلی ہے، آئی جی نے سی پی او فیصل آباد کو فائرنگ میں ملوث ملزمان کی فوری گرفتاری کا حکم دیا ہے۔
