اسلام آباد ( نئی تازہ ڈیسک) وزیراعظم شہباز شریف نے پاکستان تحریک انصاف سے مذاکرات کے لیے حکومتی اتحاد کے اراکین پر مشتمل کمیٹی تشکیل دے دی۔
وزیراعظم شہباز شریف نے سپیکر قومی اسمبلی سردار ایاز صادق کی تجویز پر مذاکراتی کمیٹی کے ناموں کا اعلان کر دیا ہے۔
کمیٹی میں نائب وزیراعظم اسحاق ڈار، رانا ثنا اللہ، سینیٹر عرفان صدیقی، راجہ پرویز اشرف، سید نوید قمر، خالد مقبول صدیقی، عبدالعلیم خان اور چودھری سالک حسین شامل کو شامل کیا گیا ہے۔
یاد رہے کہ گزشتہ رات چیئرمین تحریک انصاف بیرسٹر گوہر نے سپیکر قومی اسمبلی سے مذاکرات کے لیے اپنا کردار ادا کرنے کی درخواست کی تھی اور تحریک انصاف کے ساتھ بات چیت کی پیشکش کی تھی۔
وزیراعظم شہباز شریف نے اسپیکر قومی اسمبلی کی تجویز پر عمل کرتے ہوئے حکومتی اتحاد کی مذاکراتی کمیٹی تشکیل دی ہے، انہوں نے اس امید کا اظہار کیا کہ ملک کی سلامتی اور قومی مفاد کو ترجیح دی جائے گی۔
اس حوالے سے وزیراعظم شہباز شریف نے سپیکر قومی اسمبلی کی کاوشوں کو سراہتے ہوئے کہا کہ پاکستان ہے تو ہم سب ہیں۔
