پشاور ( نئی تازہ نیوز) خیبرپختونخوا حکومت نے صوبے کے نوجوانوں کو روزگار کے نئے مواقع فراہم کرنے اور اسکل ڈویلپمنٹ کے لیے اہم پروگرام کا آغاز کر دیا ہے۔
محکمہ تعلیم خیبر پختونخوا کے مطابق اس پروگرام کے تحت صوبہ کے نوجوانوں پر 11 ارب 50 کروڑ روپے کی رقم خرچ کی جائے گی، جبکہ 60 ہزار نوجوانوں کو مفت تربیت دی جائے گی۔
میڈیا رپورٹ کے مطابق خیبر پختونخوا کے 25 ہزار افراد کو مفت انٹرن شپ فراہم کی جائے گی، جبکہ 42 ہزار نوجوانوں کو 80 ہزار روپے تک کی گرانٹس ملیں گی۔ یہ گرانٹس خاص طور پر دیہی علاقوں اور ضم اضلاع کے نوجوانوں کے لیے مختص کی جائیں گی۔
محکمہ تعلیم کے مطابق سرکاری ٹیکنیکل اداروں سے 37 ہزار نوجوان فارغ التحصیل ہیں، جب کہ نجی ٹیکنیکل اداروں سے 36 ہزار نوجوان تعلیم مکمل کر چکے ہیں۔
یہ بھی پڑھیں : پنجاب میں شوگر کے پیدائشی مریض بچوں کے لیے مفت انسولین کا منصوبہ شروع
پروگرام کے پہلے مرحلے میں 19 ہزارنوجوان افراد کو شامل کیا جائے گا جن میں مرد اور خواتین دونوں شامل ہیں،بتایا گیا ہے کہ اب تک 806 افراد کو تربیت فراہم کی جا چکی ہے۔ گرانٹس کے لیے درخواستیں وصول کرنے کا عمل شروع ہو چکا ہے، اب تک 312 افراد درخواست دے چکے ہیں۔
