سابق وفاقی وزیر اور پی ٹی آئی کی سینیٹر ڈاکٹر ثانیہ نشتر نے سینیٹ کی نشست سے استعفیٰ دے دیا۔
میڈیا رپورٹ کے مطابق ثانیہ نشتر نے پارٹی سے مشاورت کے بعد اپنا استعفیٰ سینیٹ سیکرٹریٹ کو بھجوایا۔
سینیٹ سیکرٹریٹ نے استعفیٰ ملنے کے بعد ضروری کارروائی کا آغاز کر دیا ہے تاہم چیئرمین سینیٹ نے اس حوالے سے ایوان بال کے لیگل ونگ سے رائے طلب کی ہے کیونکہ مستعفی ہونے کیلئے کسی رکن کا خود چیئرمین سینیٹ کے سامنے پیش ہونا ضروری ہے۔
نجی ٹی وی کے مطابق ڈاکٹر ثانیہ نشتر نے جنیوا میں بچوں کی ویکسینیشن کے بین الاقوامی ادارہ میں پرکشش ملازمت ملنے کی وجہ سے سینیٹ رکنیت سے مستعفی ہونے کا فیصلہ کیا۔
یاد رہے کہ پی ٹی آئی کے حکومت ختم ہونے کے بعد ڈاکٹر ثانیہ نشتر نے زیادہ تر وقت بیرون ممالک گزارا، ثانیہ نشتر مختلف اداروں سے منسلک رہنے کے علاوہ تحریک انصاف کی حکومت میں وفاقی وزیررہیں ، وزارت کے دوران انہوں نے کورونا،احساس پروگرام اور بینظیر انکم سپورٹ پروگرام (بی آئی ایس پی) پر کام کیا۔
یاد رہے کہ ڈاکٹر ثانیہ نشتر 2021ء میںپی ٹی آئی کے ٹکٹ پر خیبرپختونخوا سے رکن سینیٹ منتخب ہوئی تھیں۔
