کراچی: محکمہ موسمیات نے کراچی میں گرمی کی حالیہ لہر مزید 4 سے 5 دن تک جاری رہنے کا امکان ظاہر کر دیا۔
محکمہ موسمیات کے ارلی وارننگ سینٹر کی پیش گوئی کے مطابق دن کے اوقات میں درجہ حرارت اوسط سے 3 سے 4 ڈگری اضافے کے ساتھ 38 ڈگری تک پہنچ سکتا ہے۔ سمندری ہوائیں غیر فعال رہیں گی، جبکہ زیادہ تر شمال مشرق اور شمال مغرب سے ہوائیں چلنے کا امکان ہے۔
اگلے چند دنوں کے دوران کراچی اور دیہی سندھ کے کچھ علاقوں میں موسم شدید گرم رہنے کی توقع ہے۔ سجاول، ٹھٹھہ، میرپور خاص، حیدرآباد،عمرکوٹ اور تھرپارکر بھی اس گرمی کی لپیٹ میں رہیں گے۔
محکمہ موسمیات کے مطابق آج اور کل عمرکوٹ اور تھرپارکر میں آندھی کے ساتھ بارش کی توقع ہے۔
