راولپنڈی ( نئی تازہ رپورٹ) محکمہ صحت کے حکام نے راولپنڈی میں ڈینگی مچھر پر قابو پانے کے لیے مچھلیوں کی مدد حاصل کر لی۔
میڈیا رپورٹ کے مطابق ڈینگی مچھر کا پھیلاؤ روکنےکے لیے محکمہ صحت کی جانب سے خاص قسم کی مچھلیوں کی مدد حاصل کی گئی ہے۔ مختلف علاقوں میں گندے پانی میں خاص قسم کی مچھلیاں چھوڑ دی گئی ہیں۔
سی ای او ہیلتھ ڈاکٹر آصف ارباب خان کے مطابق تحقیق سے یہ سامنے آیا کہ چھوٹےسائز کی مچھلیاں ڈینگی لاروا کھاتی ہیں، محکمہ صحت نے مچھلیاں پانی میں چھوڑنے کے لیے محکمہ فشریز کی مدد حاصل کی ہے۔
حکام کے مطابق خاص قسم اور خاص سائزکی مچھلیاں ڈینگی لاروا کھاکراس کے خاتمے میں مددگار ثابت ہوسکتی ہیں، راولپنڈی میں ڈینگی کے خاتمےکے لیے ہرممکن طریقہ استعمال کیا جارہا ہے۔
پنجاب میں ڈینگی کے سب زیادہ کیسز ان دنوں راولپنڈی سے رپورٹ ہو رہے ہیں، گذشتہ 24 گنٹوں کے دوران سامنے آنے والے 102مریضوں کا تعلق راولپنڈی سے تھا۔
محکمہ صحت کے مطابق گزشتہ 24 گھنٹوں کے دوران لاہور سے ڈینگی کے 3 جبکہ چکوال اور سیالکوٹ سے 2،2 کیسز رپورٹ ہوئے۔ فیصل آباد، پاکپتن، چنیوٹ، سرگودھا،اٹک،رحیم یار خان، قصور اور گوجرانوالہ سے ڈینگی کا ایک ایک کیس سامنے آیا ہے۔ رواں سال کےدوران پنجاب میں ڈینگی وائرس کے 3 ہزار 403 مریض سامنے آچکے ہیں۔
