وزارت اطلاعات و نشریات نے پاکستان ٹیلی ویژن کے کم ریٹنگ کے حامل 25 پروگراموں کو بند کرنے کا فیصلہ کر لیا۔
میدیا رپورٹ کے مطابق وفاقی وزیر اطلاعات عطااللہ تارڑ نے پی ٹی وی میں جامع اصلاحات کا آغاز کرتے ہوئے کہا ہے کہ کم ریٹنگ والے 25 پروگراموں کو بند کرنے کا فیصلہ کیا ہے۔
رپورٹ کے مطابق 25 پروگراموں کو بند کرنے کا فیصلہ فوری طور پر نافذ ہو گا، پروفیشنلزم اور تعمیری تنقید کے فروغ کے لیے نئی پالیسی کے مطابق نئے پروگرام شروع کیے جائیں گے۔
عطااللہ تارڑ نے پی ٹی وی سے سفارشی کلچر، نااہلی اور فیک نیوز کے خاتمے کا عزم ظاہر کرتے ہوئے کہا کہ نئی پالیسی کا مقصد پیشہ ورانہ رویوں اور تعمیری تنقید کو فروغ دینا ہے۔
وفاقی وزیر نے کہا کہ ٹاک شوزکی ریٹنگ سے متعلق خدشات دور کیے جائیں گے جبکہ پالیسی میں تبدیلی کی گئی ہے تاکہ تعمیری تنقید کو فروغ دیا جا سکے۔
انہوں نے کہا کہ ہمارا مقصد پاکستان ٹیلی ویژن کے شوز اور پروگراموں کو منافع بخش بنانا ہے. وزیر اطلاعات نے کہا کہ ٹی 20 ورلڈ کپ کی کامیاب کوریج کی گئی اور پی ٹی وی کو تاریخی منافع ہوا۔
