مردان( نئی تازہ رپورٹ) پشتونخوا ملی عوامی پارٹی کے چیئرمین محمود خان اچکزئی نے انکشاف کیا ہے کہ آصف زرداری نے مولانا فضل الرحمان سے دو تہاٸی اکثریت کے لیے ملاقات کی ہے۔
مردان پریس کلب میں خطاب کرتے ہوئے محمود خان اچکزئی نے کہا کہ سیاسی جماعتیں بھی چندے کے نام پر رشوت لے رہی ہیں ، زرداری نے مولانا سے دو تہائی اکثریت کے لیے ملاقات کی ہے۔
محمود اچکزئی نے کہا کہ پاکستان میں حق حکمرانی بڑا مسئلہ ہے، انتخابات میں ملک بھر میں پی ٹی آئی جیتی اور حکمرانی بھی اس کا حق ہے۔
نو مئی کے حوالے سے پشتونخوا ملی عوامی پارٹی کے چیئرمین نے کہا کہ صرف 9 مٸی کی نہیں دوسرے معاملات کی بھی تحقیقات ہونی چاہیے۔
انہوں نے کہا کہ اگر ملک میں آئین کی حکمرانی ہوتی تو پاکستان نہ ٹوٹتا،بھٹو کو پھانسی بھی نہ ہوتی اور نہ ہی بینظیر قتل ہوتی۔
محمود اچکزئی نے کہا کہ پاکستان ڈوب رہا ہے،ملک کے تمام مسائل اندرونی ہیں اور ہم بھیڑیوں کی طرح پاکستان کو نوچ رہے ہیں۔ انہوں نے کہا کہ فوج اور ایجنسیوں کے بغیر ملک نہیں چلتا، پاکستان کو چلانے کیلیے آئین کی بالادستی اور پارلیمنٹ کو طاقت کا سر چشمہ تسلیم کرنا ہوگا۔
انہوں نے کہا کہ ملک کی تمام قومیتوں کو برابر کے حقوق دیے جائیں، ہم خیرات نہیں اپنا حق مانگ رہے ہیں۔محمود اچکزئی نے کہا کہ ماضی میں نوازشریف نے وزارت کی پیش کش کی مگر میں نے انکار کردیا تھا۔
