اسلام آباد ( نئی تازہ رپورٹ) سی پی پی اے نے بجلی کی قیمت بڑھانے کی درخواست نیپرا میں جمع کرا دی، قیمت میں فی یونٹ 3 روپے 41 پیسے اضافے کی تیاری کر لی گئی۔
سینٹرل پاور پرچیزنگ اتھارٹی (سی پی پی اے) نے اپنی درخواست ماہانہ فیول پرائس ایڈجسمنٹ کی مد میں جمع کرائی ہے۔ بجلی کی قیمتوں میں اضافے سے متعلق درخواست کی سماعت نیپرا میں کل کی جائے گی ۔
درخواست میں کہا گیا ہے کہ گزشتہ ماہ 12 ارب 26کروڑ یونٹ بجلی پیداہوئی ، پیداواری لاگت 111 ارب روپے تھی۔ فرنس آئل پر 31 روپے 44 پیسے فی یونٹ کے حساب سے بجلی پیداکی گئی۔
سی پی پی اے کی درخواست میں کہا گیا ہے کہ ایل این جی سے بجلی پیداوری لاگت فی یونٹ 24 روپے ایک پیسہ رہی جبکہ ایران سے 26 روپے 9پیسے فی یونٹ کے حساب سے بجلی درآمد کی گئی۔ اس دوران لائن لاسز اور چوری کی وجہ سے 23 پیسے فی یونٹ نقصان بھی ہوا ۔ درخواست میں کہا گیا کہ بجلی کی قیمت میں فی یونٹ 3 روپے 41 پیسے اضافہ کی منظوری دی جائے۔
