امریکہ نے کینیڈا کو 7 وکٹوں سے شکست دے کر آئی سی سی ٹی 20 ورلڈکپ کے افتتاحی میچ میں کامیابی حاصل کر لی۔
ٹی20 کرکٹ ورلڈ کپ 2024 کے پہلے میچ میں کینیڈا نے پہلے بیٹنگ کرتے ہوئے 5 وکٹوں کے نقصان پرمقررہ 20 اوورز میں 194 رنز بنائے ،امریکہ نے مطلوبہ ہدف 18 ویں اوورکی چوتھی گیند پر 3 وکٹ کے نقصان پرآسانی سے حاصل کرلیا۔
امریکہ کے شہر ڈیلاس میں کھیلے گئے افتتاحی میچ میں امریکی کرکٹ ٹیم کے کپتان مونانک پٹیل نے ٹاس جیت کر کینیڈا کو بیٹنگ کی دعوت دی۔
کینیڈا کی جانب سے اوپنرزآرون جانسن اور نونیت دھالیوال نے 43 رنزکی بنیاد فراہم کی، آرون جانسن 23 اور نونیت دھالیوال 61 رنز بناکر آؤٹ ہوئے۔
پرگٹ سنگھ نے5، شریئس مووا 32، اور دلپریت باجوہ 11 رنزبنائے، نکولس کرٹن نے 51 رنز کی تیز رفتارہ اننگز کھیلی۔
امریکہ کی جانب سے علی خان، ہرمیت سنگھ اور کورے اینڈرسن نے ایک ایک وکٹ حاصل کی۔
امریکی ٹیم کی جانب سے 195 رنز کے ہدف کے تعاقب میں اسٹیون ٹیلر بغیر کوئی رن بنائے آؤٹ ہوگئے، کپتان مونانک پٹیل 16 رنز بناسکے، اینڈریو گوس اور آرون جونز نے 131 رنز کی شراکت قائم کرکے ٹیم کو فتح کے قریب پہنچایا۔
اینڈیو گوس 65 رنز بناکر آئوت ہوئے،آرون جونز نے 40 گیندوں پر 96 رنز کی ناقابل شکست تیز رفتار اننگز کھیلی جس میں 10 چھکے اور 4 چوکے شامل تھے،آرون جونز کو شاندارکارکردگی پر میچ کا بہترین کھلاڑی قرار دیا گیا۔
کینیڈا کی جانب سے کلیم ثنا ، ہیلیجراور نکھل دتا نے ایک ایک وکٹ حاصل کی۔
