ڑآۃحکراچی ( نئی تازہ مانیٹرنگ) پاکستان کے سینیئر اداکاراور صداکار طلعت حسین طویل علالت کے بعد انتقال کرگئے۔83 سالہ طلعت حسین کے انتقال کی اطلاع اُن کی صاحبزادی تزین حسین نے انسٹاگرام پر پوسٹ کے ذریعے دی۔
تزین حسین نے انسٹاگرام پر والد طلعت حسین کی تصویر پوسٹ کرتے ہوئے کہا کہ میں گہرے رنج و غم کے ساتھ اعلان کررہی ہوں کہ میرے پیارے والد طلعت حسین صاحب خالقِ حقیقی سے جا ملے ہیں۔ اُنہوں نے مداحوں سے اپیل کی کہ میرے والد طلعت حسین کی مغفرت کے لیے دُعا کریں۔
کراچی آرٹس کونسل کے صدر احمد شاہ نے طلعت حسین کے انتقال کی تصدیق کرتے ہوئے بتایا کہ وہ کئی روز سے نجی ہسپتال کے آئی سی یو میں داخل تھے ۔
ریڈیو، ٹیلی ویژن اور سنیما میں ایک منفرد اور بلند مقام بنانے والے سینیئر اداکار طلعت حسین طویل عرصے سے بیمار تھے ۔
طلعت حسین بھارت کے شہر دہلی میں 1940ء میں پیدا ہوئے تھے، اُنہوں نے پروفیسر رخشندہ حسین سے شادی کی تھی۔
حکومت پاکستان کی طرف سے 1982 میں طلعت حسین کو پرائیڈ آف پرفارمنس ایوارڈ اور2021 میں ستارہ امتیاز سے نوازا گیا تھا۔
طلعت حسین نے 1970 سے قبل کم عمری میں ہی اداکاری شروع کر دی تھی۔
طلعت حسین نے اپنی اداکاری کا آغاز پاکستان ٹیلی وژن سےکیا، بعدازاں برطانوی ٹی وی سمیت بالی وڈ فلموں میں بھی اپنی صلاحیتوں کا لوہا منوایا۔
طلعت حسین کو 2006 میں شہرت یافتہ نارویجن فلم ‘امپورٹ ایکسپورٹ’ میں بہترین معاون اداکار کے لیے امانڈا ایوارڈ سے نوازا گیا جبکہ 1986 میں فلم ‘مس بینکاک’ میں بہترین معاون اداکار کا نگار ایوارڈ حاصل کیا۔
