ملتان(نئی تازہ رپورٹ ) پاکستان کے تیزی سے ترقی کرتے ہوئے اسلامی بینک، فیصل بینک لمیٹڈ نے ملتان میں اپنے ریجنل ہیڈ کوارٹر کا افتتاح کردیا ہے، ریجنل آفس کی نئی عمارت میں فلیگ شپ برانچ کا قیام بھی عمل میں لایا گیا ہے جہاں ترجیحی صارفین کو خدمات فراہم کی جائیں گی۔
اس موقع پر فیصل بینک کے صدر اور چیف ایگزیکٹو یوسف حسین نے جنوبی پنجاب سے تعلق رکھنے والی اہم کاروباری شخصیات اور رہنماؤں کے اعزاز میں استقبالیہ بھی دیا۔ یوسف حسین نے کہا کہ ملتان ریجن میں فیصل اسلامک کی موجودگی کو وسعت دینا ایک اعزاز ہے۔
چیف ایگزیکٹو نے کہا کہ بینک مقامی صنعتی، تجارتی، ایس ایم ای زرعی، ریٹیل شعبہ جات کی کاروباری شخصیات کے ساتھ اپنے روابط کو مضبوط بناتا رہے گا۔ انہوں نے صارفین کا شکریہ ادا کرتے ہوئے کہا کہ صارفین کی جانب سے ملنے والی معاونت اور سرپرستی نے ہی فیصل بینک کو اسلامی بینکاری کا رہمنا بنایا ہے۔
یوسف حسین نے کہا کہ فیصل بینک اپنے نیٹ ورک میں تیز رفتار ترقی کا عمل جاری رکھے گا۔ انہوں نے کہا کہ انشااللہ آئندہ دو سال میں برانچوں کی تعداد 1000 تک پہنچ جائےگی۔انہوں نے کہا کہ ملک کے بڑے شہروں کے ساتھ ساتھ ایسے دیہی علاقے جہاں بینکاری کی سہولت کم دستیاب ہے وہاں اسلامی مالیات اور بینکاری کی توسیع ہمارا عزم ہے تاکہ پاکستان میں فنانشل انکلوژن حاصل ہوسکے۔
