عالمی مالیاتی فنڈ ( آئی ایم ایف) نے آئندہ بجٹ میں توانائی شعبے کے لیے پالیسی گائیڈ لائن فراہم کرتے ہوئے بجلی اور گیس کے ریٹ بروقت طے کرنے کی ہدایت کی ہے اور کہا ہے کہ بجٹ میں بجلی اور گیس کا سرکلر ڈیٹ بڑھنے نہ دیا جائے ۔
نجی ٹی وی نے ذرائع کے حوالے سے بتایا کہ آئی ایم ایف آئندہ بجٹ میں صنعتوں کے لیے گیس کے رعایتی نرخ ختم کرنے کا خواہاں ہے ، عالمی مالیاتی فنڈ نے گائیڈ لائن میں کہا ہے کہ آئندہ بجٹ میں ٹیوب ویلز کی سبسڈی ختم کی جائے، ٹیوب ویل متبادل توانائی پر منتقل کیے جائیں۔
آئی ایم ایف نے پالیسی گائیڈ لائن میں صنعتوں کےلیے بجلی سبسڈی ختم کرنے کا کہا ہے اور بجلی و گیس کے بلوں کی وصولی بہتر بنانے کی ہدایت بھی کی ہے۔
آئی ایم ایف نے متنبہ کیا ہے کہ توانائی اصلاحات کے بغیر پاکستانی معیشت خطرات سے دوچار رہے گی، آنے والے بجٹ میں توانائی کے شعبے میں مقررہ حد سے تجاوز خطرناک ہوسکتا ہے ۔
