اسلام آباد ( نئی تازہ رپورٹ) وزیر اعظم شہباز شریف نے گندم کی درآمد کے معاملہ پر انکوائری کمیٹی تشکیل دے دی، سیکرٹری کابینہ ڈویژن کمیٹی کی سربراہی کریں گے۔
میڈیا ونگ وزیراعظم آفس سے جاری بیان کے مطابق وزیراعظم شہباز شریف کی زیر صدارت ملک میں گندم کے ذخائر کی صورتحال کے حوالے سے اعلیٰ سطح کا جائزہ اجلاس منعقد ہوا۔
اجلاس میں وفاقی وزراء احد چیمہ، رانا تنویر حسین، محمد اورنگزیب، جام کمال خان، وزیر اعظم کے کوآرڈینیٹر احسان افضال اور متعلقہ حکام شریک ہوئے۔
وزیرِ اعظم نے گزشتہ برس گندم کی درآمد کے حوالے سے وزارت قومی غذائی تحفظ سے استفسار کیا کہ اچھی پیداوارہونے کے باوجود گندم درآمد کرنے کا فیصلہ کن وجوہات کی بنا پر لیا گیا۔
وزیر اعظم شہباز شریف نے کہا کہ اللہ کے فضل و کرم سے رواں سال گندم کی بمپر فصل ہوئی ہے، یقینی بنایا جائے کہ گندم کی خریداری میں کسی قسم کی تاخیر نہ ہو، گندم خریداری کے حوالے سے تمام ضروری اقدامات اٹھائے جائیں اور کسانوں کو ان کی محنت کا معاوضہ جلد پہنچایا جائے۔
وزیراعظم نے گندم کی درآمد کے معاملے کا جائزہ لینے کے لیے انکوائری کمیٹی تشکیل دے دی جس کی سربراہی سیکریٹری کابینہ ڈویژن کریں گے۔
قبل ازیں وزیراعظم نے گندم کے بحران کا نوٹس لیتے ہوئے سیکرٹری قومی غذائی تحفظ و تحقیق محمد آصف کو عہدے سے ہٹا دیا ۔ ان کی جگہ گریڈ 22 کے افسر فخر عالم کوسیکرٹری قومی غذائی تحفظ و تحقیق تعینات کر دیا گیا ہے۔
