اسلام آباد ( نئی تازہ رپورٹ) ہائی کورٹ نے وفاقی دارالحکومت اسلام آباد میں نان اورروٹی کی قیمتوں میں کمی کا نوٹیفکیشن معطل کردیا۔
جمعرات کواسلام آباد ہائی کورٹ نے نان بائی ویلفیئر ایسوسی ایشن کے صدر کی درخواست پر سماعت کی۔
ڈسٹرکٹ انتظامیہ کے نمائندے نے بتایا کہ قانون میں ترمیم کے بعد ڈی سی اوز کو قیمت کے تعین کا اختیار دے دیا گیا ہے۔
اس موقع پرنان بائی ویلفیئر ایسوسی ایشن کے وکیل بیرسٹرعمر اعجازگیلانی نے اپنے دلائل میں کہا کہ آٹا یہاں اسلام آباد میں مہنگا ہے جبکہ کرایہ بھی زیادہ ہے، انہوں نے قانونی نکتہ اٹھایا کہ کنٹرولر جنرل کی پاور سیکشن تھری کے تحت نہیں ہے۔
جسٹس طارق محمود جہانگیری نے انتظامیہ کے نمائندے سے ریمارکس دیئے کہ کیا تندور والوں سے پوچھا کہ آٹا کتنے کا آرہاہے یا صرف لوگوں کو خوش کرنے کیلئے آرڈر جاری کردیا؟
یہ بھی پڑھیں: آئی ایم ایف 29 اپریل کو پاکستان کو 1.1 ارب ڈالر جاری کرنے کی منطوری دے گا
سماعت کے بعد جسٹس طارق محمود جہانگیری نے ضلعی انتظامیہ کی طرف سے جاری کردہ نان اور روٹی کی قیمتوں میں کمی کا نوٹیفکیشن معطل کردیا۔
عدالت نےآئندہ سماعت پر فریقین سے تفصیلی جواب طلب کرلیا ہے، کیس کی سماعت 6 مئی تک کیلئے ملتوی کردی گئی۔
