پاک فوج نے بہاول نگر واقعہ کے ذمہ داران کا تعین کرنے کے لیے انکوائری کا اعلان کیا ہے۔ سیکیورٹی اور پولیس اہلکاروں پر مشتمل ٹیم مشترکہ انکوائری کرے گی۔
بہاولنگر واقعے پر پاک فوج کے شعبہ تعلقات عامہ (آئی ایس پی آر) کی طرف سے جاری بیان میں کہا گیا ہےکہ حال ہی میں بہاولنگر میں ایک افسوسناک واقعہ پیش آیا جسے فوج اور پولیس حکام کی مشترکہ کوششوں سے فوری طور پر خوش اسلوبی سے حل کرلیا گیا۔
آئی ایس پی آر کے مطابق معاملہ حل ہونےکے باوجود بعض دھڑوں نے اپنے مخصوص مفادات کی خاطر سوشل میڈیا پر ریاستی اداروں اور سرکاری محکموں کے درمیان تفریق پیدا کرنے کے لیے پروپیگنڈا شروع کر دیا۔
آئی ایس پی آر کے بیان میں بتایا گیا ہے کہ قوانین کی خلاف ورزی اور اختیارات کے ناجائز استعمال کی ذمہ داری کا تعین کرنے کے لیے انکوائری کی جائے گی۔ سکیورٹی اور پولیس حکام پر مشتمل ٹیم واقعےکی مشترکہ انکوائری کرے گی۔ مشترکہ انکوائری سے ذمہ داروں کا تعین اور حقائق کا پتہ لگ سکےگا۔
دوسری جانب پنجاب حکومت نے بہاولنگر واقعےکی تحقیقات کے لیے مشترکہ ٹیم تشکیل دے دی ہے۔
پنجاب حکومت کی جانب سے جاری ایک بیان کے مطابق بہاولنگر واقعہ افسوس ناک ہے۔ محکمہ داخلہ اور سکیورٹی اداروں پر مشتمل جوائنٹ انکوائری ٹیم تشکیل دے دی گئی ہے۔
پنجاب حکومت کے بیان میں کہا گیا ہے کہ مفادپرستوں کو ریاستی اداروں کے خلاف پرا پیگنڈا کرنے کی اجازت نہیں دی جائے گی۔
