راولپنڈی ( نئی تازہ رپورٹ) سیکورٹی فورسز نے شمالی وزیرستان میں اہم کارروائی کرتے ہوئے انتہائی مطلوب دہشت گرد کمانڈر سمیت 8 دہشت گرد وں کو ہلاک کر دیا۔
پاک فوج کے شعبہ تعلقات عامہ آئی ایس پی آر کے مطابق سیکورٹی فورسز نے اتوار اور پیر کی شب دہشت گردوں کی موجودگی کی خفیہ اطلاع پر شمالی وزیرستان میں آپریشن کیا۔
بیان کے مطابق انٹیلی جنس کی بنیاد پرآپریشن کے دوران شدید فائرنگ کے تبادلے میں انتہائی مطلوب دہشت گرد کمانڈر سحرا عرف جانان سمیت 8 دہشت گرد مارے گئے۔
بتایا گیا ہے کہ دہشت گرد سحرا 16 مارچ کو میر علی میں سیکیورٹی فورسز کی چوکی پر دہشت گردانہ حملے کی منصوبہ بندی میں ملوث تھا اور قانون نافذ کرنے والے اداروں، سیکیورٹی فورسز کو انتہائی مطلوب تھا۔
آئی ایس پی آر کے بیان کے مطابق پاکستان کی سکیورٹی فورسز ملک سے دہشتگردی کے خاتمے کے لیے پرعزم ہیں۔ جبکہ علاقے میں کسی بھی اور دہشت گرد کے خاتمے کے لیے کارروائیاں کی جا رہی ہیں۔
