پشاور( نئی تازہ مانیٹرنگ) پشاور کے مضافاتی علاقے بڈھ بیر میں والد نے منع کرنے کے باوجود گھر پرپی ٹی آئی کا جھنڈا لگانے پر بیٹے کو قتل کر دیا۔
پولیس نے واقعے کا مقدمہ مقتول عطاالرحمان کے بھائی عارف الرحمان کی مدعیت میں درج کیا ہے . ایف آئی آرمیں کہا گیا ہے کہ دونوں باپ بیٹا میں سیاسی گفتگو پر تکرار اور تلخ کلامی کا آغاز ہوا جس پر طیش میں آ کر والد نے مبینہ طور پرپستول سے اپنے بیٹے پر فائرنگ کر دی۔
بی بی سی کے مطابق مقدمے کے مدعی اور مقتول کے بھائی عارف الرحمان نے بتایا کہ ان کا بھائی قطر میں بسلسلہ روزگار مقیم تھا اور وہاں سینیٹری کا کام کرتا تھا۔
عارف الرحمان کے مطابق ان کا بھائی دو ماہ کی چھٹی لے کرگھر آیا تھا اور اسے 20 روز بعد واپس قطر جانا تھا۔
عارف کے مطابق ان کے والد اور بھائی میں بحث گھر کی چھت پر پی ٹی آئی کا جنڈا لگانے سے شروع ہوئی جو بڑھتے بڑھتے تلخ کلامی تک پہنچ گئی اور طیش میں آ کر اُن کے والد نے مبینہ طور پر عطا الرحمان پر گولی چلا دی۔
عارف کے مطابق ان کے والد کچھ عرصہ قبل ملازمت سے ریٹائر ہوئے تھے ان کے والد کا تعلق بظاہر کسی سیاسی جماعت سے نہیں تاہم علاقے میں عوامی نیشنل پارٹی کی حمایت موجود ہے ۔
