اسلام آباد ( نئی تازہ رپورٹ) ملک میں 8 فروری کو ہونے والے عام انتخابات میں جنرل نشستوں پر 882 خواتین امیدوار سامنے آ گئی ہیں۔
الیکشن کمیشن کے اعداد و شمار کے مطابق فروری کے عام انتخابات میں خواتین کی بڑی تعداد جنرل نشستوں پر الیکشن میں حصہ لے رہی ہے۔ قومی اور صوبائی اسمبلیوں کے لیے کل 882 خواتین امیدوار جنرل نشستوں پر میدان میں ہیں۔
قومی اسمبلی کی نشستوں کے لیے 312، جبکہ صوبائی اسمبلی کی نشستوں کے لیے 570 خواتین سیاسی جماعتوں کے ٹکٹ پر اور آزاد حیثیت سے میدان میں ہیں۔ سب سے زیادہ 305 خواتین پنجاب سے الیکشن میں حصہ لے رہی ہیں، بلوچستان سے سب سے کم 40 خواتین الیکشن میں شریک ہیں۔
قومی اسمبلی کی نشستوں پر 93 خواتین سیاسی جماعتوں کے ٹکٹ پر اور 219 آزاد حیثیت سے الیکشن میں شریک ہیں۔ صوبائی اسمبلی کی نشستوں پرکل 570 خواتین امیدوار الیکشن میں حصہ لے رہی ہیں۔
خیبرپختونخوا سے کل 69 خواتین جنرل نشستوں پرانتخابی میدان میں ہیں، جن میں سے 41 سیاسی جماعتوں کے ٹکٹ پر اور 28 آزاد حیثیت سے الیکشن لڑ رہی ہیں۔
پنجاب سے کل 305 خواتین جنرل نشستوں پر انتخابات میں حصہ لے رہی ہیں ، جن میں سے 62 سیاسی جماعتوں کے ٹکٹ پر اور 243 آزاد حیثیت سے انتخابی میدان میں اتری ہیں۔
سندھ سے کل 156 خواتین الیکشن حصہ لے رہی ہیں جن میں سے 61 سیاسی جماعتوں کے ٹکٹ پر اور 95 آزاد حیثیت سے میدان میں اتری ہیں۔ بلوچستان سے کل 40 خواتین الیکشن میں حصہ لے رہی ہیں، جن میں سے 18 سیاسی جماعتوں کے ٹکٹ پر، جبکہ 22 آزاد حیثیت سے الیکشن لڑ رہی ہیں۔
