اسلام آباد ( نئی تازہ رپورٹ) پاکستان تحریک انصاف کے رہنما بیرسٹر گوہر کے گھر جانے والےاسلام آباد پولیس کے پانچ افسران کو معطل کر دیا گیا۔
پی ٹی آئی کے رہنما بیرسٹر گوہر کے گھر پولیس کے جانے پر انکوائری کے معاملے پر ترجمان اسلام آباد پولیس نے اتوار کوایک بیان جاری کیا ہے۔
بیان کے مطابق 13 جنوری کو پولیس ایک مخبر کی اطلاع پر اشتہاری کی تلاش میں سیکٹر ایف سیون ٹو پہنچی تھی تاہم وہ گھر بیرسٹر گوہر کا ہے معلوم ہونے پر پولیس فوری واپس آ گئی تھی۔
ترجمان اسلام آباد پولیس کے بیان میں کہا گیا ہے کہ بیرسٹر گوہر نے سپریم کورٹ میں اپنے گھر پولیس کے جانے کی شکایت کی، جس پر چیف جسٹس پاکستان نے کیپیٹل سٹی پولیس آفیسر کو طلب کیا اور معاملے کی تحقیق کا حکم دیا تھا۔
ترجمان کے مطابق معزز عدالت نے آئی سی سی پی او کو ذاتی طور پر چئیرمن پی ٹی آئی کی شکایت سننے کا کہا، آئی سی سی پی او نے بیرسٹر گوہر کو تحقیقات کی یقین دہانی کروائی ہے۔
ترجمان کے مطابق ڈی پی او سٹی کو انکوائری افسر مقرر کر کے تفصیلی رپورٹ 3 دن میں طلب کی گئی ہے۔
ترجمان پولیس نے کہا کہ پانچ افسران بشمول ایس ایچ او مارگلہ کو تاحکمِ ثانی معطل کر دیا گیا ہے، انکوائری ہو رہی ہے، قانون کی خلاف ورزی پر اہلکاروں کے خلاف سخت کارروائی ہو گی۔
